Атырау мұнай өңдеу зауыты (АМӨЗ) – Қазақстандағы жетекші үш мұнай өңдеу кәсіпорнының бірі. Зауыт Ұлы Отан соғысы кезінде салынып, 1945 жылы пайдалануға берілді. Бүгінгі таңда кәсіпорынның негізгі иесі – «ҚазМұнайГаз» Ұлттық компаниясы.
Зауыттың жылдық мұнай өңдеу қуаттылығы 5,5 миллион тоннаны құрайды, ал өңдеу тереңдігі 86,4%-ға жетеді. АМӨЗ 20-дан астам түрлі тауарлық мұнай өнімдерін шығарады. Олардың ішінде: сұйытылған газдар, автомобиль және дизель отыны, реактивті қозғалтқыштарға арналған отын, вакуумдық газойль, пеш отыны, мазут, мұнай кокстары, техникалық күкірт, параксилол, бензол және басқа да өнімдер бар.
АМӨЗ – Қазақстанда мұнай-химия өнімдерін шығаратын ірі өндіріс орны. Сонымен қатар, кәсіпорын Атырау облысының экономикасына елеулі үлес қосып, өңірдегі ең ірі салық төлеушілердің қатарында.
